Victoria González Torralbak irabazi du eleberri beltzeko ‘Paco Camarasa’ IV. Saria

Victoria González Torralbaren Buenos tiempos lanak irabazi du eleberri beltzeko ‘Paco Camarasa’ Sariaren IV. edizioa. Sari hori 2020an sortu zen, gorantz doazen talentuei aitortza egiteko, eta, oraingo edizio honetan, jatorrizko xedea zabaldu du, 2023ko eleberri beltza saritzeko. Gure herrialdean punta-puntakoak diren bederatzi jaialdi hauetako arduradunek eratzen dute epaimahaia: Aragón Negro, BCNegra, Las Casas Ahorcadas de Cuenca, Getafe Negro, Semana Negra de Gijón, Granada Noir, Pamplona Negra, Congreso de Novela y Cine Negro de Salamanca eta Valencia Negra.

Siruela argitaletxeak kaleratu du Victoria González Torralbaren Buenos tiempos lana, eta 1970eko hamarkadako Espainia irudikatzen du, esnatze turistiko bete-betean. Mediterraneoko itsasertzeko herri batean izango den aurkikuntza zorigaiztoko batek Laura aldaraziko du, nahi gabeko protagonista. Izan ere, ikertzailea izango da, pertsonaia kezkagarri mordo batek mehatxatzen duen bilbe batean. Epaimahaiak “eleberriaren kalitate eztabaidaezina eta literatura-indarra” nabarmendu ditu, “zeinak, egunerokotik eta egiazkotasunez betetako narrazio-sentiberatasun batetik, biraketa efektistetatik oso aldendua dagoen bilbe sendoa kontatzen duen”. Buenos tiempos lanak “literatura beltz nazionalaren barnean aire fresko pitin bat dakar, giro intimista batekin eta generoan ateak zabaltzen dituen eta testuari irauteko gaitasuna ematen dion originaltasun batekin”.

Egile honen bigarren eleberria da, Planeta argitaletxearekin Llámame Méndez kaleratu eta gero. Francisco González Ledesma idazleak, Victoriaren aitak, sortutako inspektore ospetsuaren sailaren prekuela bat da, eta eleberri finalista izan zen 2018an Premio Tuber Melanosporum-Morella Negra eta Premio Cubelles Noir sarietan.

Saridun honekin batera, saria eskuratzeko aukera beste hiru izenburu finalista hauek eduki dute: Crisanta, Juan Ramón Biedmarena, Hontoria, Juan Carlos Galindorena, eta La ley del padre, Carlos Augusto Casasena.

Victoria González Torralba, Pamplona Negra jaialdian

Irabazleak Pamplona Negra jaialdiaren hurrengo edizioan parte hartuko du, urtarrilaren 23an, asteartea, egingo den mahai-inguru batean, eta bertan Paco Camarasa sariko finalistetako beste batekin, Carlos Augusto Casasekin, partekatuko du berriketaldia.

Paco Camarasaren oroitzapena ohoratu

Victoria González Torralba (Bartzelona, 1966) lizentziaduna da Informazioaren Zientzietan, eta ibilbide profesionala hainbat argitalpenetan garatu du, bereziki, kultura-arloko aldizkarietan, femeninoetan eta bidaietakoetan. “Paco Camarasa saria jasotzeak izugarri zoriontsu egiten nau”, adierazi du sariduna izan dela jakin ondoren. “Eleberriak halako aitortza jasotzeak berekin dakarren poztasunari karga emozional handia gehitu behar zaio, nire ustez: Paco Camarasaren izena Buenos Tiempos lanari lotuta gelditzeak sakon hunkitzen nau. Ezinezkoa zen Paco ezagutzea eta ez maitatzea”, azaldu du.

Irabazlearen lana aitortzeaz gain, Paco Camarasa valentziar liburu-saltzailearen oroitzapena ohoratzen jarraitu nahi da. Paco Camarasa Negra y criminal liburu-dendan arduraduna izan zen 12 urtean, Barcelonetan. Genero beltzeko eleberri onenak jarri zituen publikoaren eskura, bai naziokoak eta bai nazioartekoak ere, indartu bitartean Barcelona Negra jaialdia zuzendu zuen eta talentu berriak aurkitzeko borrokatu zen. Izan ere, talentu haietako asko babestu zituen bere liburu-dendan.

Sariak ez du diru-kopururik, urterokoa da eta, horrez gain, saridunaren literatura-ibilbidea bultzatzeko xedea du. Hori dela-eta, beste urte batez, irabazleak gonbidapena jasoko du sari hau ematen duten bederatzi jaialdietara joateko: Aragón Negro, BCNegra, Las Casas Ahorcadas de Cuenca, Getafe Negro, Semana Negra de Gijón, Granada Noir, Pamplona Negra, Congreso de Novela y Cine Negro de Salamanca eta Valencia Negra. Hartara, hurrengo edizioetan hartuko dute González Torralba.